ព្រះសីហនុ៖ អភិបាលខេត្តព្រះសីហនុលោក គួច ចំរើន បានថ្លែងថាអ្នកធ្វើការផ្នែកសេវាដឹកជញ្ជូនភ្ញៀវចេញ ចូលព្រលានយន្តហោះនឹងមិនអនុញ្ញាតឱ្យចេញចូលឡើយប្រសិនមិនមានប័ណ្ណចាក់វ៉ាក់សាំងការពារជំងឺកូវីដ-១៩។ លោកថ្លែងបែបនេះក្នុងកិច្ចប្រជុំស្តីពីការអនុវត្តន៍វិធានសុវត្ថិភាពទេសចរណ៍ (SOP) ដើម្បីត្រៀមលក្ខណៈទទួលទេសចរណ៍អន្តរជាតិវ៉ាក់សាំងនៅរសៀលថ្ងៃទី១៥ ខែវិច្ឆិកា ឆ្នាំ២០២១នេះ។

អភិបាលខេត្តព្រះសីហនុ លោក គួច ចំរើន បានមានប្រសាសន៍ថា រាជរដ្ឋាភិបាលអនុញ្ញាតឱ្យអ្នកដំណើរចូលមកកម្ពុជាតាមផ្លូវអាកាស ផ្លូវទឹក និងផ្លូវគោក ដោយមិនតម្រូវឱ្យធ្វើចត្តាឡីស័កទៀតទេគ្រាន់តែធ្វើតែត្រូវធ្វើតេស្តរហ័ស។ ដោយឡែកចំពោះអ្នករត់តាក់ស៊ីដឹកភ្ញៀវ ក៏ត្រូវមានប័ណ្ណចាក់វ៉ាក់សាំង បើមិនមានប័ណ្ណចាក់វ៉ាក់សាំងមិនអនុញ្ញាតឱ្យចូលអាកាសយានដ្ឋានអន្តរជាតិឡើយ ហើយអាកាសយានដ្ឋានអន្តរជាតិត្រូវគ្រប់គ្រងអ្នករត់តាក់ស៊ីឱ្យបានត្រឹមត្រូវដើម្បីចៀសវាងការដណ្តើមភ្ញៀវគ្នានាំឱ្យបាត់បង់សណ្តាប់ធ្នាប់។

ចំពោះភ្ញៀវទេសចរណ៍ចូលតាមផ្លូវទឹក មុនពេលចុះពីលើនាវាត្រូវធ្វើតេស្តរកមេរោគកូវីដជាមុនសិន ដូច្នេះត្រូវជូនដំណឹងមករដ្ឋបាលខេត្តជាមុន ដើម្បីងាយស្រួលត្រៀមក្រុមគ្រូពេទ្យចុះយកសំណាកពីភ្ញៀវបានទាន់ពេលវេលា។

លោកអភិបាលខេត្តបានប្រកាសជូន សាធារណជនដែលមិនមានឯកសារដើម្បីចាក់វ៉ាក់សាំង ឱ្យទៅកាន់សាលាឃុំ សង្កាត់ ឱ្យអាជ្ញាធរបញ្ជាក់លិខិតជូន ដើម្បីមានឯកសារគ្រប់គ្រាន់ក្នុងការចាក់វ៉ាក់សាំងបានទាន់ពេលវេលា។

កាលពីថ្ងៃទី១៤ ខែវិច្ឆិកា ឆ្នាំ២០២១ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន ចេញបទបញ្ជាផ្ទាល់មាត់មួយសម្រេចបញ្ឈប់ការធ្វើចត្តាឡីស័កដល់អ្នកដែលបានចាក់វ៉ាក់សាំងការពារកូវីដ-១៩ រួចដែលបានចូលមកប្រទេសកម្ពុជា ដោយគ្រាន់តែធ្វើសំណាកតេស្តរហ័សតែប៉ុណ្ណោះ ដោយអនុវត្តន៍ចាប់ពីថ្ងៃទី១៥ ខែវិច្ឆិកា ឆ្នាំ២០២១តទៅ ដោយថាដើម្បីជំរុញការស្ដារសង្គម សេដ្ឋកិច្ច ទេសចរណ៍និងសម្រួលដល់ពលរដ្ឋអាចចេញដំណើរទៅក្រៅប្រទេស និងចូលមកក្នុងប្រទេសឡើងវិញ៕